الي صار اليوم بصير دايماً معي وباشكال مختلفه ,وهو عدم المقدره على التركيز وتذكر الاشياء بشكل متصل
يعني بكل بساطه ممكن اسئل واحد اسمه وبنفس الوقت انسا اسمع اسمه او ما اركز معاه باسمه الي حكا من شوي وارجع اسئله مره و مرتين وثلاث
زي فلم السمكه دولي بالزبط وهو بحكي عن سمكه بتعاني من مشكله اسمها فقدان الذاكره القصير short memory loss
وهي انك تضلك مشتت ومش مركز بموضوع لاكثر من ثواني
حتا الحوار الطبيعي ما سلم من هل مشكله بكون حوار منفصل وغير متصل, يعني ممكن تبلش تناقش سياسه تنتهي بالحكي عن فوائد قشر البطيخ
وهاي الظاهره شبيها بمرض اسمه ADHD
Attention deficit hyperactivity disorder
وبمعناها بشكل او باخر عدم قصور الانتباه وفرط النشاط
اليوم الي بحكي عنه حصل. كنت بدي امر على البيت اخذ شاحن الايفون واشحل جوالي عن طريق شاحن السياره واروح احضر مباره في كوفي شوب
مريت على البيت اخذت الشاحن حطيته بجيبتي الخلفيه,استعملت الحمام بسرعه و طلعت
واول ما ركبت السياره صرت ادور على الشاحن مش لاقيه !!
وانا ناسي اني حاطه بجيبتي الخلفيه
المهم انا فكرت حالي اني ما جبته اصلاً
وهاي هي المشكله ضلت عندي الفكره انه الشاحن مش معي وبالبيت وطفا الجوال شحن
وحضرت المباراه وروحت على البيت, واول ما وصلت البيت قعدت ادور على الشاحن وانا مش لاقيه
بالاخير صرت ادور بجيابي ولقيته بجيبت بنطلوني الخلفيه
هلا هذا مش عيب , لا هو عيب لكن مش حصري , هو عيب وخلل بصيب المجتمع كله
امرات بكون احكي مع شخص و فجأه بتلاقي فصل وسرح, شو صارلو, ما بتعرف فقد تركيزه
وبقطع حوارك الي كان مثلاً عن السياسه وبفتح موضوع ما اله علاقه كلياً مثل انو شو رأيك بالدراسه عبر الانترنت
هذا الموضوع صار مزمن وسيئ , والاسوأ انه انت شخص طموح وعندك حياتك ومشاغلك , وبتلاقي حالك بتضيع وقت كبير على سوشيال ميديا باشكالها وانت تلحق الدائره الحمراء الي جواها رقم ابيض كل ما تطلع لك
بتلاقي حالك مبنج ومجمد وانت بتحرك اصبعك الابهم لتحت ولفوق وبتعمل سكرل داون وبتتفرج على محتوى لسا للتو كنت شايفه
هذا هون المرض المزمن المهم انك تنتبهله بحق وحقيق
وهو ادمان السكرول داون انا هيك بسميه
تحليلي للموضوع والمشكله ككل برجع للتطبيقات الي بتزورها مثل الفيس بوك , انستجرام , سناب تشات … وطريقه توصيلهم للمعلومه الي صار سهل سريع وكثيف
و كثافه حجم المعلومات الي منتعرضلها صار أكبر من قدرتنا العقليه بحق وحقيق
المواضيع كثيره و منتشره على الانترنت من ضحك دين سياسه
وكلها معلومات متناقضه و متجدده كل دقيقه
الي راح يصير انه عقلك ما راح يخزن شي وراح يحاول يحصل الصافي وبصير يحذف المحتوى اول باول
يعني بتصير انت تتفرج على الفيس بوك تعمل سكرول داون , دماغك عماله شغال وبفلتر اول باول
بفلتر وبصنف و بقسم هذا مهم هذا مش مهم هذا بدو وقت هذا فيديو على السريع
دماغك بضل بحاله فلتره وعدم تركيز دائمه وبضل مخدر ومركن بمعلومته كامله على الجوال
وتطبيق للحكي هذا لنفرض مثلاً اني سئلتك من هو هارون الرشيد
الاسم انت سامعه فيه اكيد وعارف انك بتعرفه او قارئ عنه او مار عليك
لكن اول شي خطر ببالك تمسك جوالك وتبحث عن “هارون الرشيد”
شو الي صار ..
عقلك معتمد تماماً على الجوال الي في ايدك
راح تبحث عن هارون الرشيد تقرأ مقدمه عنه وبعد ما تسكر الصفحه خلال 10 دقائق راح تنسى كل شيئ قرأته عنه
الدماغ غير طريقه تعامله مع الاشياء والاخطر انه بس تسكر التلفون وتحطه هيك على جنب وبتبلش تتفاعل مع المجتمع الحقيقي الي حولك بدل السوشيال ميديا
بتلاقي دماغك شغال معك بنفس الطريقه قاعد بفلتر العالم وبضل يعمل سوايب وسكرول بالافكار الي تطلع براسك ويشطب المعلومات اول باول
فعلياً دماغك بتحول لشي زي الجوال الي بايدك نفسه
لكن بسعه ذاكره اقل ,فتلاقي بشطب الاحداث من حياتك اول باول ما في ذاكره لانه
الذاكره اصبحت شبه معدومه واركيزه كلها على الجوال
الموضوع بصير يحولك لشخص غير منتج وصافن, مبنج, مجمد , معضم الوقت بتخطط وبتفكر بعدين بتتبنج وبترجع تخطط وتفكر وبتكتشف انك عامل الخطه نفسها كل مره دون ما تنتج او تعمل اشي
هذا الي بصير لادمغتنا اشي مش سهل ولازم تنتبه عليه بشكل حريص اذا كنت حاب تصير شخص منتج بحياتك
وإبدأ
كل ما عليك انك تحاول تسيطر على الجوال الي في ايدك وتعتمد على دماغك اكثر
الي انا بلشت اعمله انه وقف أو خفف استعمال السوشيال ميديا هاي واسيطر عليها, استعمل الجوال زي زمان بس مكالمات , اعتمد على دماغك اكثر من تلفونك
وأهم شي لما تعمل حوارات حاول تسمع كويس للناس وحاول ركز لأنك بدك ترجع تمرن دماغك ليرجع يعطيك
ويعطيك العافيه